Банклар бизнесни фаол кредитлашни деярли тўхтатган Апрель ойида тижорат банкларининг кредит қўйилмалари аввалги ойга нисбатан икки баробар камтарроқ, 5,2 трлн.сўмга (+1,3%) ўсган ва 413,4 трлн.сўмга етган. Ойлик ўсишнинг атига 14%и ёки 715 млрд.сўми корпоратив, яъни бизнесга ажратилган кредитлар ҳисобига тўғри келган. Агар Агробанкнинг асосан қишлоқ хўжалиги билан боғлиқ бўлган 967 млрд.сўмлик кредит қўйилмалари ўсиши чегирилса, айтиш мумкинки, ўзбек банклари корпоратив сектордан четланишни бошлаган. Ўнта банкда, уларнинг орасида тизимли тўртта давлат банки ва энг йирик хусусий банк ҳам бор, корпоратив портфелнинг қисқариши қайд этилган. Айтиш керакки, гап бу ерда банкларнинг бизнесга кредит ажратиш хоҳишлари йўқлигидагина эмас, асосий масала хусусий бизнес кредит олиб рискка боришни истамай қўйганлигида. Ҳисоби ва ўлчови бор бизнес яқин ва ўрта истиқболда рўшнолик бўлишига ишонаётгани йўқ. Чакана, яъни аҳоли ажратилаётган секторда молиялаштиришнинг ўсиши давом этмоқда. Апрелда аҳолига ажратилган кредитлар қолдиғи 4,5 трлн.сўмдан кўпроқни ташкил этган. Маҳсулотлар қирқимида негизини автокредитлар ташкил этадиган истеъмол кредитлар қолдиғи энг кўп 2,1 трлн.сўмга ўсган. Марказий банк айни шу сегментдаги иштаҳаларни бироз тийиб туришга уринаётгани бежиз эмас. Ипотека кредитларининг ўсиши мартга нисбатан сусайган (+801 млрд.сўм) бўлса, оилавий тадбиркорлик учун ажратилаётган "ебкетар" кредитлар ҳажми ошишда давом этмоқда (+761 млрд.сўм). Кредитлашнинг секинлашиши фонида муаммоли кредитларнинг ҳажми ва улуши бироз ошган. Апрель ойи давомида NPL қолдиғи асосан давлат банклари ҳисобига 425 млрд.сўмга кўпайган ва 14,8 трлн.сўмга етган. NPL улуши 3,5%дан 3,6%гача кўтарилган.