Муаммоли кредитлар яна кескин ошишни бошлаган 2022 йил 1 апрель ҳолатига 9 ойлик минимумгача пасайган муаммоли кредитлар қолдиғи апрель ойи якунларига кўра яна оша бошлаган. 2022 йил 1 май ҳолатига муаммоли кредитлар (NPL) қолдиғи 1,3 трлн.сўмга кўпайиб, 18,1 трлн.сўмни ташкил этган. Жами кредит портфелидаги NPL улуши эса 5,3%га етган (+0,4%) . Давлат банклари орасида муаммоли кредитлар қолдиғининг энг катта ўсиши Ўзсаноатқурилишбанкда кузатилган (+1,0 трлн.сўм). Хусусий банклар ичида кредит портфелининг кескин ёмонлашуви ва муаммоли кредитларнинг ўсиши Равнақбанкда қайд этилган (+142 млрд.сўм). Таъкидлаш лозимки, апрель ойи давомида банк тизими кредит қолдиғи - 340,3 трлн.сўм ҳажмида, деярли ўзгаришсиз қолган. Кредит портфелининг ўзгармай қолиши сўмнинг ревальвацияси билан кўпроқ боғлиқ, яъни апрель ойида валютадаги кредитларнинг қолдиғи курс ўзгариши эвазига пасайган (март ойида сезиларли ўсиш кузатилган эди). Апрель ойида кредит бозорида энг катта фаоллик давлат банклари ичида Агробанк (+391 млрд.сўм), хусусий банклар орасида эса Капиталбанк (+474 млрд.сўм) тарафидан намоён этилган.