Тижорат банкларининг кредит портфели сезиларли даражада яхшиланишни бошлаган Анча мураккаб кечган март ойида тижорат банкларининг кредит портфели бирданига 4%га, ёки 13,1 трлн.сўмга ўсиб, 340,3 трлн.сўм етган. Албатта кредит портфелининг ўсиши долларлашув даражаси юқори бўлган давлат банклари ҳиссасига тўғри келган (девальвация эффекти). Айни вақтда, салобий прогнозларга қарамай, муаммоли кредитлар (NPL) даражаси суммада ҳам, ҳажмда ҳам кескин қисқарган. Ой давомида муаммоли кредитлар 381 млрд. сўмга камайиб, 16,8 трлн.сўмни ташкил этган. NPL даражаси 2021 йил июндан буён биринчи марта 5,0%дан пасайган ва 4,9%дан иборат бўлган. Муаммоли кредитлар ва NPLнинг пасайиши асосан давлат банкларида (Халқ банки, Ипотека-банк ҳамда Алоқабанк) рўй берганига қараганда, ой давомида фаол расмий ва норасмий реструктуризация амалларига қўл урилган кўринади. Бу реалликка қанчалик мос келади, маълум муддат ўтмагунча хулоса қилиш қийин. Узоқ вақтдан буён аҳволи ўнгланмаётган, соғломлаштириш имкони қолмаган, аллақачон ёпиб юборилиши лозим бўлган Hi-Tech Bank ва Туркистонбанк, аросатда қолган Ўзагроэкспортбанк кабиларга нисбатан жиддий чоралар кўрилмаса ҳолат бошқа банкларга ҳам юқишини, ичкарида ҳам, ташқарида ҳам (халқаро молия институтлари ва донорларда) банк назоратига нисбатан саволлар пайдо қилишини истисно этиб бўлмайди.