Президент фармони ва жамоатчилик талабларини бажармаган сенатор ва депутатларни жазолаб бўладими? Муҳримбой ҳар икки палатада жонли эфирлар қайта тикланмагунича Олий Мажлис ва унинг аъзолари фаолиятини — юқори палатаси бўладими ё қуйи, фарқи йўқ — ёритишни буткул тўхтатиш, бойкот эълон қилиш ҳақида мулоҳаза юритмоқда. Сайламагандан кейин, мандатни чақириб ололмагандан кейин, жазолай олмагандан кейин сайловчи, айниқса қонунга итоаткор фуқаро бошқа нима ҳам қила олсин. Ҳа айтгандай, нормал давлатларда парламент жамият ва жамоатчилик фикрлари, мундарижаси ва иродасини ифода этмай қолганда парламентга муддатидан аввал сайловлар ўтказилади. Бунинг икки йўли бор, орияти бор, халқ мандатини ифодаламай қўйганини тушунган парламент ўзи ваколатини соқит қилади. Бу, тушунарлики, бизда имконсиз. Иккинчи йўл - Президент парламентни тарқатиб юборади ва муддатидан аввал янги сайловлар эълон қилади. Конституциямизда бундай процедура акс этган, лекин бирон марта қўлланилмаган. Дарвоқе, 2019 йилда мана шу чақириқ "сайловлари" "натижалари" эълон қилинган куни парламентимиздан нималар кутишимиз мумкинлиги ҳақида ёзган эканман.