​Автокредитлар банкларнинг асосий муаммосига айланади Автомобиль савдоси июнь ойида ўтган йилнинг июнига нисбатан 29,8%га қулаган. Йилнинг тегишли ойларига нисбатан сотувларнинг қисқариши бешинчи ой кетма-кет давом этмоқда. Бозорнинг пасайиши айниқса иккиламчи бозорда яққол кўринади. Ўтган йилнинг июни билан солиштирганда, сотувлар ҳажми 1,6 баробардан кўпга қулаган. Иқтисодий тадқиқотлар ва ислоҳотлар маркази ҳисобига кўра, ҳудудий кесимда енгил автомобиллар савдосининг динамикасида июнь ойида энг катта пасайиш Сурхондарё ва Андижон вилоятларида, шунингдек, Қорақалпоғистон Республикасида қайд этилган. Маълумот учун, айни шу ҳудудларда охирги 2 йилда иккиламчи автомобилларни сотиб олиш учун автокредит ажратиш авжига чиққан эди. Иккиламчи бозорнинг қулаши келаётган август-октябрь янада яққол намоён бўлади (ўтган йили айни шу даврда автокредитлашнинг энг қизиб кетган даври кузатилган). Тенденция бўйича савдолар кўлами бозорга автокредитлаш ва бўлиб тўлаш орқали спекуляция кириб келмаган 2021 йил даражасигача қайтиши лозим. Автомобиль бозоридаги эврилишлардан автокредитлашга муккасидан кетган қатор банклар асосий зарбани қабул қилишга тайер бўлишлари керак. Дастлабки бадалсиз ё 25 фоиздан кам улушдаги ёки имтиезли давр туфайли кам емирилган юқори фоизли автокредитлар бўйича гаров қийматининг қарз қолдиғи қийматидан кескин пасайиб кетиши шу кунларнинг ўзида бошланган. Кредитга олинган автомобилларни банкка ташлаб кетиш қарзни тўлашдан кўра афзалроққа айланишига гувоҳ бўла бошлаймиз.