Хитойда кўчмас мулк пуфагининг ёрилиши энди банк секторига кўчган Хитой расмийлари пандемиядан кейин чуқур молиявий муаммоларга дуч келган қурилиш компаниялари ва девелоперларни турли воситалар билан қўллашга уриниб келди. Камида 2 йиллик натижасиз ҳаракатлардан кейин аввалига дунёнинг энг йирик девелопери Evergrande'ни тугатишга қарор қилинган бўлса, кейин қурилиш бозоридаги 50дан ортиқ гигант компаниялар томонидан дефолт эълон қилинди. Қурилиш секторидаги муаммолар аллақачон банкларнинг тўлов қобилияти ва ликвидлигига таъсир кўрсата бошлаган эди. Лекин муаммо энди, анча кечикиб очиқ тан олина бошлади. Ўтган ойнинг охирида 40та банкнинг банкротлиги бу айсбергнинг учи холос. Кўчмас мулк секторига шўнғиб кетган минглаб хитой банклари йиллар давомида муаммоли активларини яшириб ёки кўрсатмай келган, бизнес ва аҳолининг ўсиб бораётган қарз юкига қарамай, янги кредитларни молиялаштиришдан тийилмаган (таниш манзара, шундай эмасми?). Хитой банкларининг бугунги муаммолари 2000 йиллар бошидаги америка банкларининг ҳолатини эслатади. Лекин Америкадан фарқли ўлароқ, Хитойда компартия секторнинг қулашига йўл қўймоқчи эмас. Банкрот бўлаетган банкларни улардан каттароқ банкларга қўшиб юбориш стратегияси танланган. Бу муаммони янада чуқурлаштириши ва фақат кейинга суриши, соғлом банкларни ҳам касаллантириши ҳақида бош қотирилаётгани йўқ. Хитойдаги банк кризисининг давом этиши Ўзбекистондаги лойиҳаларнинг молиялаштиришда акс этиши мумкин. Энергетикадан тортиб, қурилишгача энг йирик лойиҳаларни амалга ошираетган хитойлик инвесторлар ўз маблағлари билан эмас, хитой банкларининг кредитлари ҳисобига лойиҳаларга киришганлар.