Хитой Evergrande'ни қутқармоқчи эмас "Буюк Хитой муаммоси" дея ном ном олган йирик девелопер Evergrande'нинг мажбуриятлари бўйича муаммолар нафақат Хитойда, балки бутун жаҳон иқтисодиётида янги стресслар яратиши мумкин. Кейинги ҳафталарда бўлиб ўтаётган воқеалар кўрсатмоқдаки, Хитой Evergrande'ни қутқариб қолмоқчи эмас. Хитой ўнминглаб уй-жой қурувчилари, миллионлаб уй эгалари (улар орасида қисман тўлов қилганлар ҳам бор) ва бозор ликвидлилигини асраб қолмоқчи. Демак энг катта жабрдийда Evergrande'нинг Хитойдан ташқаридаги кредиторлари бўлади. Evergrande сентябрь ойида учта мажбурият бўйича тўловларни амалга ошира олгани йўқ. Компаниянинг муаммоли дейилаётган мажбуриятлари қиймати 305 млрд.доллардан ортади ва улар асосан валютадаги ташқи мажбуриятлардир. Бугун Гонгонг биржаси Evergrande ва у билан боғлиқ компаниялар акциялари билан савдоларни тўхтатди. Хитойдаги бозорлар бугун дам олган, эртага кўп нарса ҳал бўлади. Evergrande билан боғлиқ вазият бугуннинг ўзидаёқ айрим иккинчи эшелондаги валюталарнинг долларга нисбатан курс йўқотишларини келтириб чиқарди. Жабрдийдалар орасида турк лираси ҳам бор. Шундай қилиб, Хитой маъмуриятининг мақсади аниқ, лекин сақлаб қолинадиганлар қаторида Evergrande'нинг облигациялари эгалари йўқ. Демак энди, катта эҳтимол, Evergrande Хитойнинг эмас, товонини қолган дунё тўлаши керак муаммога айланади. Нима бўлгандаям, Evergrande кейси локал ва глобал бозорларда девелоперлар фаолияти, айниқса уларнинг ташқи қарз жамғариш масалалари регуляция қилиниши лозимлигини яна бир бор кўрсатди.