​Глобал бозор учун ёмон сигнал - Хитойда уй-жой нархи пасайишни бошлади Кузатувлар бошланган охирги олти йилда илк бора Хитойнинг энг йирик 70 шаҳридаги бирламчи таклифларни қамраган уй-жой нархлари индексида манфий кўрсаткич қайд этилган. Бу ерда гап энг йирик девелопер Evergrande дастлабки бўнаги тўланган 1,6 млн. уй-жой бўйича ёки тўлов муддати келган 300 млрд.долларлик мажбуриятлар бажарилиши савол остида экани ёки молиявий бўҳронга кириб бораётган қурувчи ва девелоперларга ишонч пасайиб бораётганида эмас. Стагнация қамрови кенгроқ. Ер аукционларида таклиф этилаётган участкалар сотилмаяпти. Иккиламчи бозорда нархлар пасайиши суръати бирламчи бозордан кўра деярли уч карра баланд. Айрим манбаларда иккиламчи манбаларда сотувлар ҳажми ўтган йилги кўрсаткичлардан 63%га қисқариб кетгани қайд этилмоқда. Дунёнинг иккинчи хўжалиги бўлган Хитой иқтисодиётида жиддий муаммолар бошланган. Қурилиш ва уй-жой сектори Хитой иқтисодиётининг деярли чорак қисмини ташкил этади ва бунга қўшимча равишда электроэнергия етишмовчилиги ҳисобига касаллик бирин-кетин бошқа секторларга ҳам тарқалиши мумкин.