Банкларнинг қурувчилик фаолиятига панжа орасидан қараш давом этадими? 2024 йилдан буён аввалига давлат банклари, кейин хусусий банклар ҳам ёппасига отель, санаторий, музей, туристик комплекс ва бошқа банк фаолиятига умуман алоқаси йўқ бинолар қуришга “ихтиёрий” мажбурланаётгани эндиликда ҳеч кимга сир эмас. Айрим банклар бор, капиталининг 2-3 карра ҳажмида нобанк ва самарасиз бино-иншоотлар портфелини жамлаб бўлган. Бу қурилган саноқсиз биноларга очиқ бозорда харидор йўқ (фақат зарарига сотилиши мумкин). Чунки қурилишдаёқ пудрат қиймати 2-3 карра шиширилган, айрим ҳолатларда пул ўзлаштириш учун ғирт коррупцион схемаларга айланиб қолган. Нима учун қурилган улар? Қисқа қилиб айтганда, ўзбекча кўзбўямачилик учун. Ташриф объектлари ясаб очко олиш ва ўзи қарз ботқоққа ботиб ётган банклар “ислоҳотларга” ўз ҳиссасини қўшаётганини кўрсатиш учун. Энг қизиғи, нафақат бузуқ тизим иштирокчилари, ташқи аудиторлар ҳам, халқаро молия институтлари ҳам билади, қурувчига айланган банклар пруденциал талаблар очиқ-ошкора бузилаётганини, бу акциядорлар, кредиторлар ва омонатчилар манфаати учун ўта зиёнли амалиёт эканини. Шундай экан, қайсидир туппа-тузук бонка бино қуриш учун аффилланган қурувчиларни ёллаётганидан ҳайрон бўлмаслик керак. Бу тизим, жузъий ҳолат эмас.