Антикоррупция агентлиги энергетика ва транспортга ажратилган триллионлаб субсидияларни ҳам ўрганадими? Коррупцияга қарши курашиш агентлиги тадбиркорлик субъектларига ажратилган субсидияларни ўрганмоқда экан. Агентликка кўра, Андижон вилоятида 7,8 млрд сўм миқдоридаги субсидия маблағлардан 2,6 млрд сўми Вазирлар Маҳкамасининг 2023 йил 22 июлдаги 307-сон қарори талабларига зид равишда мақсадсиз сарфланган. Шундан 1,8 млрд сўмлик қисми ўзлаштириб юборилган. Фарғонада эса шу йўналишда 9,3 млрд.сўм субсидиядан 1,8 млрд.сўми ўзлаштириб юборилган. Кўламни кўраяпсизми? Ажратилаётган субсидияларнинг 25-30%и ўзлаштириб юборилаяпти, бу ҳали аниқлангани. Ўрганишлар энди субсидияланаётган бошқа соҳаларниям қамраб олиши керак. Энди ўзингизга тасаввур қилинг, бюджетни астарини чиқариб юбораётган энергетика ва транспортга ажратилаётган триллионлаб субсидиялар бўйича ўзлаштириш даражаси қандай? Субсидиялар якунда қандай бенефициарлар чўнтакларини тўлдирмоқда? Қандай сарфланмоқда? Самараси қандай бўлмоқда? Нима учун энг кўп субсидияланаётган энергетика ва транспортда истеъмолчилар натижа кўрмаяпти (нима учун ҳам чўнтагимиздан, ҳам солиғимиздан тўлашимиз керак)? Нега энг катта субсидияларни энергетика ва транспорт корчалонлари ўзлаштираётган бўлса-да, ўрганишлар йўқ? Антикоррупция ўрганмаса, Ҳисоб палатаси ўрганмаса, ким ўрганади?