Биринчи қаватлардаги 46 минг квартирада тадбиркорлик қилиш мумкин Ахборотга интервью берган вазирлар бандликни ошириш ва камбағалликни қисқартириш бўйича амалий ёндашувлар ва ечимлар ҳақида гапиришган (21- дақиқадан кўринг). Хусусан, Қурилиш ва уй-жой коммунал хўжалиги вазири Шерзод Ҳидоятовнинг айтишича, 46 мингдан ортиқ квартира биринчи қаватларда жойлашган. Улардан нотурар жой фондига ўтказмасдан савдо ва хизмат кўрсатиш мақсадларида фойдаланиш иш ўринлари яратиши мумкин. Яъни квартирани нотурар жойга ўтказмасдан сартарошхона, ателье, гўзаллик салони ва бошқа кичик хизмат кўрсатиш объектларини очиш мумкин бўлади. Бунинг учун алоҳида кириш эшигини очиш ва ички хоналарни мослаштиришнинг ўзи етади. Биринчи қаватлардаги квартираларда тадбиркорлик фаолиятини хонадоннинг мақомини ўзгартирмасдан амалга оширишга рухсат берувчи соддароқ — хабардор қилиш тартибига ўтиш таклиф этилган. Бу бўйича тегишли ҳужжат бир ой ичида ишлаб чиқилиши керак.