Қорақалпоғистонда оралиқ сайловлар 20 сентябрь куни 25 номзод Қорақалпоғистон Жўқорғи Кенгесида бўш қолган 5та депутатлик ўрни учун кураш олиб боради. Катта эҳтимол билан мана шу 25 номзод ичида Қорақалпоғистоннинг бўлажак раҳбари ҳам бор. Масалан, номзодлар орасида энг ёши улуғи 63-сонли «Қоракўл» сайлов округидан Ўзбекистон Республикаси президенти ҳузуридаги Оролбўйи халқаро инновация маркази директори 65 ёшли Камалов Мурат Қаллибекович ҳисобланади. Энг ёши эса 25-сонли «Навбаҳор» сайлов округидан 28 ёшли Ерниязов Какимбек Ақилбекович ҳисобланади (аввалги раҳбарнинг фамилиядоши). Эслатиб ўтамиз, Қорақалпоғистон Конституцияга кўра, Қорақалпоғистон Республикаси Жўқорғи Кенгеси Раиси ўз ваколатини тўхтатганда ўн кун муддат ичида Қорақалпоғистон Республикаси Жўқорғи Кенгеси янги Раисининг сайлови ўтказилиши белгиланган. Муса Ерниязов вафотидан кейин ушбу лавозим 41 кундан буён бўш қолмоқда.