Айбдор болтамас, айбдор кунда Давлетов твит ёзаяпти: "Бакиров на кунўз, на газетаўз ҳимояси бўйича пост қўймабди. Шунақа-да а?" Албатта, бу твит ҳазил оҳангида ёзилган. Яна ҳазил оҳангида айтиш ва давом эттириш мумкинки, агар биз яқин орада кутилаётган қоп-қора турғунликка кириб кетгудек бўлсак, болаларимиз, набираларимизга ёпилиб кетган Кунўз ёки Газетаўз ҳақида шивирлаб афсонавий нималарнидир айтиб берамиз. Жиддийликка қайтсак, муносабатим бор, лекин сал кейинроққа қолдирмоқчийдим, чунки катта эҳтимол "овозларни жиловлашга" қаратилган совуқ сиёсат доирасида АОКАдан учбурчак хатларни Дарё ҳам, Соф ҳам, Репост ва бошқалар, қатор блогерлар ҳам олган бўлиши мумкин. Айтгандай, Дарё эрталабдан буён очилмаяпти. Кўпчиликнинг ОАВнинг овозини ўчиришга бўлган муносабатни АОКАнинг янги раҳбарияти билан боғлаётгани унчалар тўғримас назаримда. Менинг муносабатим: АОКА сиёсий цензура институти сифатида бутунлай тугатилиши лозим. Унга кўпчилик истагандек яхши одам раҳбар бўлиши ёки ёмон одам раҳбар бўлиши оқибатларни юмшатади, деб кутиш жамоавий инфантилизмдир. Муаммо "ёмон" Ходжаев ёки "яхши" Алламжоновда ёки интеллигент Саиджоновда эмас, муаммо АОКАнинг мавжудлигида. Яна Шавкат Раҳмоннинг "Оддий вазифа" эртаги эсга тушади: Дев барибир дев, ўзининг девлигини қилади. Дев акамизнинг инсофга келиб қолар, ўзгарар, кайфияти яхши бўлар, тепадагилар инсофга чақирар деб кутиш ейилиш навбатининг кейинги ҳафтагача сурилиши холос. @the_bakiroo