“Tashkent city”га кириш учун тўлов жорий қилиниши қонунга зид “Tashkent city” халқаро ишбилармонлик маркази ҳудудида объектларни қуриш ва улардан фойдаланиш дирекцияси давлат унитар корхонасининг (ДУК) 15.12.2020 йилдаги буйруғига асосан “Tashkent city”га кириш учун тўлов жорий қилинди. Унга кўра, 5 ёшдан катта бўлган барча фуқаролар, шунингдек автомобиллар ҳам “Tashkent city”га кирган тақдирда пул тўлайдиган бўлди. Демак, ушбу буйруқнинг амал қилиш доираси республика ҳудудидаги барча вилоятларга ва ҳаттоки чет давлатдан келган фуқароларга ҳам татбиқ қилинмоқда. Яъни буйруқда барча учун умум мажбурий характерга эга бўлган ҳуқуқий нормалар белгиланганлиги сабабли, ушбу буйруқ норматив-ҳуқуқий ҳужжатга тенглаштирилмоқда. Мисол учун, Андижондан келган фуқаро ҳам, Самарқанддан келган фуқаро ҳам, ҳаттоки Россиядан келган фуқаро ҳам, агар “Tashkent city”га кирса пул тўлашга мажбур бўлади. Норматив-ҳуқуқий ҳужжат нима? ДУКнинг бундай ҳужжат қабул қилишга ваколати борми? “Норматив-ҳуқуқий ҳужжатлар тўғрисида”ги Қонуннинг 3-моддасида умум мажбурий давлат кўрсатмалари сифатида ҳуқуқий нормаларни белгилашга, ўзгартиришга ёки бекор қилишга қаратилган расмий ҳужжат - норматив-ҳуқуқий ҳужжат ҳисобланиши белгиланган. (ДУКнинг буйруғида мазкур қонунда белгиланган элементларнинг барчаси мужассам) Қонуннинг 4-моддасида Олий Мажлис палаталари, Президент, Вазирлар Маҳкамаси, вазирликлар, давлат қўмиталари ва идоралар, маҳаллий давлат ҳокимияти органлари норматив-ҳуқуқий ҳужжатлар қабул қилиш ҳуқуқига эга эканлиги белгиланган. Хўш, ДУК юқорида номи тилга олинганлардан қайси бирига киради? Ҳеч қайси бирига. ДУК томонидан чиқарилган буйруқ норматив-ҳуқуқий ҳужжат ҳисобланадими? Йўқ. Хулоса ўзингиздан. ❗Шунга кўра, ДУКнинг республика бўйича умуммажбурий аҳамиятга эга қоидаларни ўз ичига олган қонунга зид мазкур буйруғини бекор қилиш лозим. @huquqshunosning_kundaligi