Уддаланган захарлашлар ҳақида Алексей Навальнийнинг Владимир Путин топшириғига кўра захарланиши, бу бўйича Кремлнинг тўғридан-тўғри буюртмачи экани далилланган суриштирувлар, мақолалар ва чиқишларда Навальнийгача яна кимлар Путиннинг жиноий тўдаси тарафидан захарлангани ва захарланишга уринилгани кўп эсланди. Собиқ разведкачи Сергей Скрипаль ва унинг қизи, ношир Петр Верзилов, мухолифатчи Владимир Кара-Мурза, бизнесмен Александр Перепеличний, собиқ чекист Александр Литвиненко, журналист Анна Политковская, журналист Юрий Щекочихин, Украинанинг учинчи президенти Виктор Юшченко. Қизиғи, бу саналган шахсларнинг барчасини битта жиҳат - Путинга мухолифлик ёки Путин уларни ўзига душман деб билгани бирлаштириб туради. Яна бир жиҳат шуки, бу захарлашларнинг биронтасида якуний мақсадга етилмаган, яъни қотиллик уддаланмаган. Энди қаранг, агар уддаланмаган захарлашлар сони шунча бўлса, уддалангани қанча экан? Навальнийни захарлаш иш бермагач, захарлаш орқали қотиллик билан машғул Путин агентлари устидан қанчалик кулишаётганига қарамай, улар ўз ишининг устаси эканини ёддан чиқармаслик керак. Агар захарлаш усули иш бермаганида улар қайта ва қайта сиёсий қотилликнинг бу воситасига мурожаат этишмаган бўларди. Навальний, ундан аввал Сергей Скрипаль, уларни даволаган шифокорлар кейинги мулоқотларда кўп такрорладики, улар мисолида қотиллар дозани тўғри белгилай олишмаган ёки объект керакли миқдордаги захарни тўлиқ қабул қилмаган ёки уларга ўта тез тиббий ёрдам кўрсатилган. Агар махсус операция вақтида доза мутаносиб равишда қурбон объекти танасига кирита олинган бўлса ва унга бир неча соат сифатли тиббий ёрдам кўрсатилмаса, Новичок билан захарланган одам инсульт ёки инфаркт белгилари билан вафот этиши мумкин. Ҳеч ким инсульт ёки инфаркт билан ўлган инсонни Новичок билан захарланганига шубҳа қилмайди. Айниқса танланган қурбон катта ёшли ёки маълум ёндош касалликларга эга бўлган бўлса. Шу билан бирга қурбон бирданига ўлмай, ётиб қолган тақдирда ҳам Новичок 3- ё 4- суткада организмни тарк этади. Энди савол: Путин ўзининг геосиёсий мақсадларига эришиш ва ҳокимиятини кенгайтириш йўлида ўзига ёқмаган нечта шахсни захарлаш йўли билан йўқ қила олган? @the_bakiroo