Туҳматчи эмасман, шунчаки ҳайронман холос Компанияга "махсус буюртма" асосида уюштирилаётган туҳматларни бир четга қўя турайлик. Кечаги баёнотнинг "жаҳон тажрибасига асосан ҳар 1000 дона автомобилда 28 донагача нуқсон чиқиши назарда тутилган бўлиб, жамиятнинг ушбу кўрсаткичи ҳозирда 15 донани ташкил этади" деган қисми ёзилаётганда муаллифлар нималарни ҳис этган экан? Кечадан бери шуни ўйлайман. 2009 йилдан буён 4 марта маҳаллий автосаноатимиз маҳсулотини сотиб олишга тўғри келган. Менга бирон марта брак бўлмаган маҳсулот рўпара келмаган, афсуски (майда-чуйда камчиликларни айтмаяпман). Биринчи сотиб олган автомашинам ҳатто ўт олмасди. Иккинчисининг олди ойнасидан ёмғир ёққанда автомашина салонига сув оқарди. Учинчисининг коробкаси муаммоли чиққан. Мана бу ҳозиргисининг олд ойнага сув сочгичи ишламайди. Доим ўзим билан баклашкада сув олиб юраман. Шунинг учун, кечадан бери ўйлайман ўша 1000 та машинадан 985тасининг бахтли эгаси ким экан-а? Улар қаерда яшашар экан? Бу рўйхатга тушиш учун нима қилиш керак? Биладиган борми? Дарвоқе, туҳматчи бўлманг, номини асло атаманг. 80- йиллар охирида Совет иттифоқи ёлғон ва исқиртликларга дош бера олмай ўлаётган кунларда диссидентлардан бири ҳеч нима ёзилмаган оппоқ қоғоз ватманни кўтариб пикетга чиққан экан. Нега қоғозга ҳеч нима ёзилмаган, қўрқасанми, дея сўрашса "Ёзувсиз ҳам ҳаммаси тушунарлику" деб жавоб берган экан ўша пикетчи. @the_bakiroo