Ўзавтомоторсга махсус буюртма асосида туҳмат қилишмоқда экан Мен биламан "туҳматчилар" кимлигини. Биттаси анов-манов ташкилот эмас, нақ Ўзбекистон Республикаси Ҳисоб палатаси. Ҳисоб палатаси маълумотига кўра харидорлардан автомашина нархи ичида олинган 3%лик йиғим 2020 йил давомида тўланмай келинган. Бошқача айтганда, “UzAuto Motors” АЖ томонидан 2020 йилнинг январь-сентябрь ойларида 582,6 млрд сўм йиғимни харидорлардан олиб, бюджетга тўламаган. Ўзида олиб қолган. Бу ҳол давом этса 2020 йил охирига қадар тўланмаган солиқ суммаси 776,8 млрд сўмни ташкил этиши мумкин. Яна бир туҳмат эса компания импорт қилинган автомашиналарга бож тўламаётгани билан боғлиқ. Тўланмаётган бож суммаси шартли ҳисобларда триллионларга боради. Триллионлаб бож тўламай, миллиардлаб даромад олаётган компанияга "туҳмат" уюштираётганларни компания яна бир бор огоҳлантираяпти. Агар махфий протоколлар борлигини ошкор қилаверишса, охирги чораларни ишга солишади. Мана бу ерда эса бутун бошли халқ эртадан-кечгача компанияга туҳматлар тўқимоқда. Бутун дунёда 1000та автодан 28тасида брак чиқиши норма бўлса-ю, қилиб юрган ишларингни қаранглар. Машинанг брак чиққан бўлса, компанияда нима айб, ана шаҳар тўла устахона, салондан тўғри устахонага олиб бормай, уйга миниб боргач, брак бўладида.