Газ импорти ниҳоят тан олинаётгани ва легитимлашаётгани ҳақида Мурожаатнома умумий контекстида эълон қилинган иккинчи муҳим мужда бу газни импорт қилишга феълан илк бор изн берилаётгани билан боғлиқ. Иқтибос: "Шунингдек, табиий газ таъминотида монополияни бекор қилиб, бозор механизмларини жорий этамиз. Бунда ишлаб чиқарувчи ва импортёрларга биржа орқали табиий газни сотиш, улгуржи истеъмолчилар эса газни сотиб олиш ҳуқуқига эга бўлади. «Ўзтрансгаз» компанияси эса фақат газни транспортировка қилади". Расмий лаҳжадан кенг халқ оммаси тилига ўгирсак, бу Ўзбекистондаги исталган компания молиявий имконияти бўлса, хоҳ Туркманистондаги, хоҳ Қозоғистондаги етказиб берувчилардан сотиб олиши мумкин. Агар газтранспорт инфратузилмаси реверс етказиб бериш бўйича техник имкониятлар бўлса, масалан, Россия ёки Озарбойжондан ҳам газ олиш мумкин бўлади. «Ўзтрансгаз»нинг функцияси сотиб олинган газни сотиб олувчи манзилига ёки сотиб олувчи кўрсатган бошқа истеъмолчи манзилигача етказиб беришдан иборат бўлади. Шартли айтганда, масалан, катта молиявий имкониятларга эга Оҳангаронцемент ёки Қувасойцемент туркман газини сотиб олиш бўйича шартнома тузса, ишлаб чиқариш учун ўзига кераклисини ишлатиб, қолганини улгуржи нархларда бошқа истеъмолчиларга, масалан ўша ҳудуддаги Оҳангароншифер ёки Кварц корхонасига сотиши ҳам мумкин бўлади. Ўзтрансгаз туркманлардан сотиб олинган газни кўрсатилган ҳажмларда манзилларга етказиб бериш мажбуриятини қабул қилади ва бунинг учун комиссия олади. Кейинги ўнйилликларда энергетика тизимида давом этаётган жараёнлар инобатга олинса, қачондир бу ҳолат юз бериши, яъни Ўзбекистон газ экспортчисидан газ импортерига айланиши тан олиниши лозим эди. @the_bakiroo