Бузилган тизимни ўнглаш ўрнига, бузуқларни аниқлашда давом этаяпмиз Хусусий банклардан бирининг бошқарув раиси тадбиркорлардан бирига 4 млрд. cўм миқдорида кредит ажратиб бериш учун пора сифатида 15 минг АҚШ доллари талаб қилгани ва сўралган пулдан 103 млн. сўмни ўз танишига тегишли МЧЖнинг ҳисоб рақамига ўтказиш орқали қўлга киритгани айтилмоқда. Нормал кредит бозорига эга давлатлар учун нафақат кулгули, балки тушунарсиз ҳолат. Нега пора олади, давлатники эмас, хусусий банк бўлса, ўша кредитни пора олмай, юқорироқ фоизда берса бўлмайдими дейди нормал иқтисодий базага эга бўлган одам. Бўлмайди, чунки... Бўлмайди, чунки, кредит фоизларини бозор эмас, бозорнинг кўринмас қўлига эмас, чиновникларнинг қўлига ишонадиганлар фалон фоиздан ошмасин дея белгилаганидан кейин фарқ ва дефицит юзага келади, дефицит бор экан фарқ пора, чўтал, қўшимча тўлов сифатида ўзлаштирилади. Бу бутун картинанинг бир қисми холос. Бошланиши, фикри ожизимча, шу кредитни ажратиш учун депозит жалб қилиш ва депозит фоизидаги фарқни тўлаш учун пул керак бўлган. Чунки депозитлар фоизларини ҳам чиновниклар белгилайди, табиийки, фарқ юзага келади ва бу фарқ пора, чўтал, қўшимча тўлов сифатида берилмаса депозиторлар, айниқса давлат назорати остидаги депозиторлар бир сўм пулниям банкка жойлаштирмайди. Шу ўринда депозит жойлаштириш бўйича ўтказилаётган аукционлар ўтказилиши жудаям кулгули экани ёдга тушади: Аукцион бошланишидан аввал барча иштирокчилар аввалдан белгилаб қўйилган энг юқори фоиз таклифини беришади, ундан ортиқ фоиз таклифини бериша олмайди. Ғолиб эса бир хил фоиз таклифини берган иштирокчилардан фақат биттаси бўлади, ваҳоланки ҳамма иштирокчининг таклифи бир хил. Қандай қилиб, қанақасига, ҳеч ким билмайди. Фокус! Мана шунақа ўзи бузуқ тизимда бузуқларни аниқлашда давом этаяпмиз. Албатта, айбдор айби исботланса, жазосини олиши керак, тизимнинг бузуқлиги унинг айбини соқит қилмайди. @the_bankiroff