Иккитагина категория ўринли - Қонуний ва Ноқонуний 2 кун аввал ишдан чиқиб, машина олдига келсам, чиқиш иккита машина билан устма-уст тўсиб қўйилган. Биттаси рақамини қолдирмаган ҳатто, иккинчиси ҳартугул телефонини ёзиб қолдирган экан. Телефон қилдим, жавоб бўлмади, "перезвоню" кўринишида хабар келди, "чиқиб кетишга имкон берсангиз, машинани олиб турсангиз" тарзида жавоб ёздим, реакция бўлмади. Яна қайта телефон қилдим, "чиқаяпман" деган смс келди. Шу тариқа яна 10 дақиқа кутдим. Қани энди келақолса. Кейин яна телефон қилдим, энди умуман "рад" тугмаси босиб юборилди. Охири "Агар машингизни олмасангиз, ЙҲХБ ва эвакуатор чақираман" деб ёздим. Шундаям реакция бўлмади. Ўша куни ўтказилаётган тадбир сабаб узоқ бўлмаган жойда ЙҲХБ инспекторлари туришганди, ҳай-ҳайлаб, имо ишора билан чақирдим. Ўзимни таништириб, тўхтаб туриш қоидаларини бузган ҳар икки машина бўйича қоидабузарликни қайд этишини ва базага киритишини талаб қилдим. Планшет ўрнатилган хизмат машинаси узоқдалигини баҳона қилиб рад этди. Агар у ўз вазифасини бажармаса, ўзим униям, қоида бузаётган ҳар икки автомашинаниям суратга тушириб платформаган жойлашимни айтсам, инспектор нима дейди денг: "Ака, расмга тушириб жарима қўллаш, мусулмончиликка тўғри келмайди, келинг тўсиб қўйган бўлса балонини тешинг, капотига чизиб кетинг, нима қиласиз, ёмон одамнинг (бу ерда бошқа уятли сўз бор) ишини қилиб". Ёқамни ушладим. Тасаввур қилинг, бу йўл қоидалари бузилишини олдини олиши лозим бўлган инспекторнинг муносабати. Кейинги кунларда турли тоифа одамларнинг йўлда қоида бузишларга қарши энди энди шаклланаётган жамоатчилик назоратига билдираётган муносабатларини кўриб, эшитиб, келган хулосам шу бўлди: Кўпчилигимизда қоидалар бўйича ўлчовларимиз ё бузилиб қолган ёки ўзи азалдан бўлмаган. Яъни, қоидалар агар зиён келтирса, бизга нисбатан ишлатилмаслиги керак. Агар бизга қоидалар ишлатилса, дарров жабрланувчига айланамиз. Буни далиллаш учун ҳатто эътиқод масалалари ва муносабатларини келтиришга ҳам уринамиз. Лекин билишимиз лозимки, бу ерда, ўта юқори ижтимоий аҳамиятга эга ушбу масалада иккитагина категория ўринли - Қонуний ва Ноқонуний. Яхши ё ёмон, гуноҳ ё савоб категориялари бу ўринда тўғри эмас. Йўл ҳаракатларига амал қилмаслик, хусусан тўхташ ва тўхтаб туриб қоидаларини бузиш - Ноқонуний! Йўл ҳаракатларига амал қилмаган, хусусан, тўхташ ва тўхтаб туриш қоидаларини бузаётган транспорт воситаларини фото ва видеога қайд этиш - Қонуний! Бунинг учун қонунчиликда белгиланган мукофотни олиш - Қонуний! Йўл ҳаракатларига амал қилмаган, хусусан, тўхташ ва тўхтаб туриш қоидаларини бузаётган транспорт воситаларини қайта ва қайта фото ва видеога олиш ва бунинг учун қайта ва қайта мукофот олиш, ҳатто бу ишни касб қилиб олган бўлса ҳам - Қонуний! @the_bankiroff