Инфляция хатари жиддийлигича қолмоқда Гарчи январь ойи инфляцияси 1,0%ни ташкил этган бўлсада, йиллик ҳисобдаги инфляция кетма-кет 4 ойлик пасайишдан кейин яна кўтарила бошлаган ва 11,6%ни ташкил этган. Бу 2021 йилда мўлжал қилинган кўрсатгич - 9-10%лик коридордан анча баланд. Тўғри, бу йилнинг фақат биринчи ойи ва ўтган йилнинг январь ойи қуйи базасининг таъсири катта. Эътиборлиси, озиқ-овқат инфляцияси йиллик ҳисобда 15,5% даражасида сақланиб қолмоқда. Озиқ-овқат кам даромадли қатламлар истеъмолида жуда юқори улушни ташкил этиши инобатга олинса, уларнинг инфляцион сезувчанлиги баландлигидан ва ёмон кутилмалардан воз кечилмаётганидан асло ажабланмаса бўлади.