Январда ойлик инфляция 1%га етмаган 2023 йилннг биринчи ойида 0,8%лик расмий инфляция қайд этилган. Бу охирги уч йилдаги энг паст кўрсаткич. Йиллик инфляция 12,2% (-0,1%)гача пасайган. Январда озиқ-овқатлар 1,0%га, ноозиқ-овқатлар 0,6%га, хизматлар эса 0,7%га қимматлагани кўрсатилган. Асосий емаклардан тухум 2,0%га, , пиёз 44,7%га, картошка 1,4%га, сабзи 1,5%га, яъни бошқа озиқ-овқатлардан тезроқ қимматлаган. Статистика шунингдек, шакарни 1,4%га, кунгабоқар ёғини 0,7%га ва пахта ёғини 0,5%га арзонлаганини ҳам илғай олган. Электр ва газ ва ёқилғининг бошқа турларининг нархи январь ойида ўзгармаган, деб хулоса қилинган. Қўшимчасига, "2023 йилнинг январь ойида қатор ҳудудларда бензин нархи пасайиши кузатилди" дея чиройли қофия билан абзац якунланган. Йўловчи ташиш хизматлари 1,1%га, товар ташиш хизматлари эса 0,2%га қимматлаган холос. Изоҳ шарт эмас. Биз жуда тез орада бир хонали инфляция тугул, ундан пастроғига ҳам эришамиз. Чунки биз аввал ҳам бу йўлдан ўтганмиз. Инфляцияни паст кўрсатишга уриниш Ўзбекистон учун янгилик эмас. Чунки инфляция қанчалик паст кўрсатилса, гўёки аҳолининг реал даромадлари шунча баландроқ ўсгандек кўринади. Маълумот учун, 21- асрдаги тарихимизда энг паст инфляция 2004 йилда чизилган. Атига 3,7%. Охирги 10 йилликда эса энг паст инфляция 2015 йилда, олдинги эпоха ўзининг платосига етганда чизилган: 5,6%.