Маънавиятли ўзбек цензурасининг бети ва кети ҳақида Польшалик журналист Агнешка Пикулицканинг Ўзбекистонда аккредитациядан ўтиш йўлида дуч келган муаммолари фақат сиёсий ва ижтимоий омиллар билан боғлиқ эмас. Агнешка бу ҳақида твиттерда бутун бошли тред ёзди. Аёлларга нисбатан зўравонлик ва шилқимликлар одатда ёпиқлигича қолиб кетади, чунки анъанавий жамият бунда шилқим ё зўравонларни эмас, аёлларнинг ўзини айблайди: "Ўзинг айбдорсан!" Албатта, масала ва муаммо кечирим сўраш, шилқимни ишдан ҳайдаш ва Агнешкага аккредитация тақдим этиш билан якунланмаслиги керак. Шилқимлик ва жинсий босимгача олиб боришни тўхтатиб туриши мумкин бўлган бошқа саволлар кўп: Нега ўзининг очиқлигини тинимсиз такрорлаётган мамлакатда хорижий журналистнинг аккредитацияга аризаси 2 ой кўрилиши керак? Шунчалар яширадиган нарсамиз кўпми? Нега аккредитация учун Ўзбекистон ҳақида сохта ва мақтовли мақола ёзиш лозим? Шунчалар ёлғонга муҳтожмизми? Нега аккредитацияни 6 ойгача чўзган масъулга ҳеч қандай жазо йўқ? Аккредитация берилмаган ёки чўзилган фақат Агнешка эмасдир! Бу тизимми ё жузъий ҳолат? Эркак журналистлар-чи? Уларга рухсат бериш учун қандай босим ўтказилади? Аёллар учун Рустами бор муассасанинг эркак журналистларга ишлатадиган қандай воситаси бор?