Ички цензура - бу росмана цензура, цензорлар тарафидан ўрнатиладиган энг ёмон цензура Кирилл Альтман Alter Ego'нинг навбатдаги сонида Ўзбекистонда ўз миссиясини якунлаётган АҚШ элчиси жаноб Дэниел Розенблюм билан суҳбат қурган. Интервью шуниси билан қизиқ-ки, муаллиф ва ҳамсуҳбат вергуллар, абзацлар ва тезислар аро бир неча бор ички цензура масаласига мурожаат қилишган. Совет иттифоқи, эски Ўзбекистон ва янги Ўзбекистоннинг охирги йилларидаги жараёнлар ва ўлчовлардан келиб чиқиб айта оламанки, ички цензурага ҳавола бошландими, бу росмана цензура бор дегани. Ички цензура бу ёзувчи, журналист, рассом, шоир ва умуман ижодкорнинг танловсиз йўқотишларга рўпара қилинган ҳолда ўзини ўзи чеклашга йўналтириш. Яъни танловсиз, имконсиз қолдириш. Шу маънода ички цензура цензорлар тарафидан ўрнатиладиган энг ёмон цензура ҳам.