Шунчаки берилиши лозим саволлар Бундан 26 ой муқаддам Ўзбекистон Uсell бренди асосида фаолият юритиб келган Coscom МЧЖнинг 94% улушини 215 миллион АҚШ долларига сотиб олган эди. Демак, ўша вақтда Coscom МЧЖнинг 100% улуши камида 228 миллион АҚШ доллари қийматига эга бўлган. Давлат активларини бошқариш агентлиги янги ташкил этилгани айтилаётган Digital Holding уставига Coscom МЧЖнинг 100% улушини киритмоқда. Янги холдингда Давлат активларини бошқариш агентлигининг улуши 49% бўлади. Қолган 51% «Диджитал Инвест» назоратида бўлади. Бу дегани, агар Coscom МЧЖнинг 100% улуши қайта баҳоланмаган тақдирда ҳам, «Диджитал Инвест» камида 237 миллион АҚШ долларилик улушга эга бўлиши керак дегани. «Диджитал Инвест»нинг ичида нима бор? Икки компания - CRPT Turon ва ICS Holding Uzbekistan. Биринчи компания қатор имтиёзлар асосида мажбурий маркировка лойиҳасини амалга оширмоқда. Номи шу кунгача очиқ манбаларда қайд бўлмаган ICS Holding Uzbekistan нима билан машғуллигини ва қандай активларга эга эканини кимдир биладими? Мен, масалан, билмайман. Шу икки компания 237 миллион доллар турадими? Ким бу нархда уларни баҳолади ва янги компания таркибига қабул қилмоқда? Шу саволга албатта жавоб берилиши лозим ва лобуд! Велосипед эгаси 900 та мижози бор новвой дўстининг олдига келиб, кел, иккимиз янги компания ташкил этамиз, сен новвойхонанг билан, мен велосипедим билан улуш қўшаман, лекин янги компанияда менинг улушим 51% бўлади деса, новвой рози бўладими?