Coca-cola Ichimligi Uzbekiston'нинг давлат улушини сотиш жараёнида навбатдаги босқич бошланмоқда Кўп ва хўб мунозараларга сабаб бўлган ва бўлаётган хусусийлаштириш жараёнининг навбатдаги босқичи ҳақида ахборот берилди. Маълум бўлишича, давлат улушини сотиш жараёнининг иккинчи босқичига ўтказилган талабгорлар билан Давлат активлари агентлиги ҳамда Компания ўртасида Ахборотни ошкор этмаслик тўғрисида битимлар имзоланган. “Rothschild & Cie” инвестиция банки томонидан талабгорларга иккинчи босқич юзасидан жараён хати юборилиб, Coca-cola Ichimligi Uzbekiston'нинг 2017, 2018 ва 2019 йиллардаги молиявий ҳисоботлари, бизнес режаси ҳамда Компания фаолиятининг молиявий, солиққа оид, ташкилий ва ҳуқуқий жиҳатлари батафсил баён этилган ҳисоботлар тақдим этилган. Эндиликда талабгорларга виртуал маълумотлар базасидан фойдаланган ҳолда Компанияга оид қўшимча ўрганишларни ўтказиш, Компания тақдимотида иштирок этиш, Компания раҳбарияти билан мулоқот ҳамда савол-жавоблар сессияси учун имконият берилади.