Эркинлик таклифи ва Эркинлик талаби ҳақида Юқорининг хоҳиши туфайли тоталитар ўтмишдан эркинлик томон ҳаракатга тушган жамиятларда эркинлик таклифи босқичма-босқич ошириб борилади. Лекин бир муддат ўтиб, шундай вазиятга келинадики, порция-порция қилиб таклиф этилаётган эркинлик таклифи эркинлик талабини қондиришга етмай қола бошлайди. Яъни Эркинлик талаби тезроқ ўса бошлайди. Эркинлик бераётганлар Эркинлик тақдим этишда ортда қола бошлайдилар. Шу нуқта ўта муҳим. Бу сувайирғич нуқтадан ортга қайтиш ҳам, олдинга қараб силжиш ҳам мумкин. Тарихга қаралса, ортга қайтишлар етарлича бўлган. Яъни эркинликка бўлган талабнинг ошиб боришидан келиб чиқиб, қўшимча эркинлик таклифи тақдим этилмайди. Эркинликка бўлган талаб ва Эркинликка бўлган таклиф чизиқлари мувозанатлашуви Эркинликка бўлган талабни тийиш, чеклаш орқали амалга оширилади. Қондирилмаган эркинлик талаби ҳеч қаёққа йўқ бўлмайди. У ўзига бошқа "қиммат нархларда" янги ва ноформал каналлар ахтара бошлайди.