Сўз ва эркинлик Ўтган тўрт ярим йиллик уринишларимиз, олдинга ва орқага ташлаган қадамларимиз кўрсатдики, сўз айтиш мумкин бўлса-ю, эркинлик борлиги эълон қилинса-ю, сўз эркинлиги пайдо бўлиб қолавермайди. Биз яна бир бор тажрибамизда кўрдикки, эркин сайловларда шаклланган парламент - иккинчи ҳокимият ва мустақил суд - учинчи ҳокимият йўқ экан, тўртинчи ҳокимият бўлиши мумкин эмас. Ҳа, уни матбуот деб аташ мумкин, лекин бу мўрт ва ожиз нимарса тўртинчи ҳокимиятдан кўра бешинчи колонна ёки олтинчи палатага келбат беради. Уни қўрқитиш, уни бошқариш, уни манипуляциялаш, уни сотиш, уни сотиб олиш мумкин. Ҳа, одатда бу кунда ОАВ ишчилари, журналист ва блогерлар табрикланади, совға салом, кимгадир уй, кимгадир имтиёз дегандек улашилади. Дунёнинг ҳеч бир мамлакатида йўқ эътибор ҳақида ваъзлар ўқилади. Вақтлар келади, булар тарихда қолади, имтиёз, табрик ва совға-саломлар ўрнини тоқат эгаллайди. Қўнғироқ ўрнига тоқат, қўрқитиш ўрнига тоқат, сотиб олиш ўрнига тоқат, энг ёмон ёвуз ҳаракатлар ўрнини ҳам тоқат эгаллайди. Шунда нафақат Сўз ва Эркинлик, Сўз Эркинлиги ҳам бўй чўзади. Чунки унинг ёнида Сўз эркинлигининг ажралмас иловалари- эркин сайловларда сайланган Парламент ва мустақил Суд ҳам собит туради.