«Танқидчиларга, «ёқимсизлар»га келганда бошқа ҳеч кимга ишламаётган қонун ва унинг нормалари албатта ишлатилади» Маъмурий жавобгарлик тўғрисидаги кодекс ва «Ахборотлаштириш тўғрисида»ги қонунга ўзгартиш ва қўшимчалар киритиш ҳақидаги қонун лойиҳаси бўйича Kun.uz қатор фаолларнинг фикрлари билан қизиққан. Муносабат сўралганлар қаторида мен томонимдан, хусусан қуйидагилар билдирилганди: «Биринчидан, бизда амалиётда қонунлар кўпроқ дўстларга эмас, нодўстларга қўлланилади. Бошқа қонунлар, ҳеч бир қонун ишламаслиги мумкин, лекин танқидчиларга, «ёқимсизлар»га келганда бошқа ҳеч кимга ишламаётган қонун ва унинг нормалари албатта ишлатилади. Иккинчидан, мустақил суд мавжуд эмас. Яъни, масалан Ҳокимият вакиллари талабига бўйсунмаслик важи билан маҳкама очилганда айбланаётган шахс ўзининг айбсизлигини етарли далиллар бўлган тақдирда ҳам исботлаши жуда қийин. Суд ижро ҳокимиятининг бир иловасига айлантирилган шароитда бу жуда катта манипуляциялар яратади».