Яқинда “Бунёдкор” — “Андижон” учрашувини стадиондан кузатдим. Футбол аввалгидан анча ўзгарган. Клублар давлат улуши бор корхоналар томонидан молиялаштирилишига чек қўйилса, қолган йўналишларда силжиш чакки эмас. Бугун ПФЛ Россия компанияларидан бири билан ишлашни тўхтатгани ҳақида яхши янгилик етиб келди. InStat ҳақида бу соҳадагилар яхши билади. Ўйинлар ва футболчилар статистикасини ипидан-игнасига қадар мониторинг қилиб борувчи бу компания якунда барча ахборотни сотади. Агар бирор клуб ўз клуби ҳақидаги таҳлилларни олишни истаса, йилига 7 мингдан 10 минг еврогача тўлаб бериши керак бўлади. Шундан келиб чиқиб, ПФЛ бир йил аввал Суперлиганинг барча клуби таҳлилларини ўзи сотиб олган ва иштирокчи клубларга бепул тақдим этган. Табиийки, ПФЛ барча жамоа учун маълумотни сотиб олаётганидан келиб чиқиб, унга яхшигина чегирма тақдим этилган. Ўтган бир йил ичида ПФЛ вазиятни ўрганиб, худди шундай таҳлилларни тақдим эта оладиган маҳаллий мутахассисларни тўплаган. Мана бу хабарда айтиляптики, 2021 йилдан бошлаб ҳудди аввалги кўринишда Суперлига клубларига барча таҳлил ва анализлар бепул берилади. Бундан албатта клуб мураббийлари ютади. Улар асосий таркиб ва машғулотларни танлашда, футболчилар билан ишлашда таҳлилларга суянади. Фарқи шундаки, энди ПФЛ ўтган йилдагидан икки марта камроқ чиқим қилади. Масаланинг энг асосий жиҳати шунда. Демак, биринчидан ПФЛ энди Россия компаниясининг қўлига ва нархига қараб қолмайди. Иккинчидан, ўтган йилги айнан шунга йўналтирилган чиқимларини икки марта камайтиради. Учинчидан, маҳаллий мутахассисларни иш билан таъминлайди. Тўртинчидан, шу йўналишда иш олиб борувчилар мутахассислар кўламини кенгайтириш учун йўл очади.