Ўзбекистон Профессионал футбол лигасида ижобий ўзгаришлар кўзга ташланаётгани қувонарли. Тўғри, айрим жабҳаларда ташкилот ҳали ҳам эски иш услубидан воз кечгани йўқ. У клублардан олинадиган бадал пуллари эвазига кун кўради. Ва айтиш керакки, бу тизимдан бирданига воз кечишнинг иложи ҳам йўқ. Аммо ташкилот тепасига ёш кадрларнинг келиши, яхши ўзгаришларни тезлаштираётгани муҳим жиҳат. Бизга етиб келишича, 28 йил давомида тинимсиз ошириб келинган бадал пуллари, 2021 йилдан бошлаб илк марта қисқариш йўлига ўтади. Яъни, буёғига ЎзПФЛ босқичма-босқич клубларни қийнашдан воз кечиб боради (клублар эса давлат ғазнасини қийнашдан шундай воз кечиб бориши шарт). Ҳозир гап бу ҳақда эмас. ЎзПФЛ ва ниҳоят ҳужжатларни ҳам тартибга келтириш йўлига ўтди, бу муҳим жиҳат. Бошланишига “Футболчилар мақоми ва трансфери бўйича регламент” янгиланди ва икки тилда ташкилот расмий сайтига жойланди. Бу регламент 7-8 йилдан буён ўзгаришсиз қолаётгани учун, бугунги кун талабларига деярли жавоб бермасди. Энди эса уни ҳар йили такомиллаштириб бориш имкони мавжуд. Бизда одамлар футболчилар қанчага сотилиши, қай тартибда сотилиши, уларнинг футбол мактабларидан катта футболга қандай кириб келиши, трансфер суммалари қаерга келиб тушиши кабиларга жуда қизиқади. Мазкур регламентни албатта ўқиб чиқинг, сиз унда ўзингизни қизиқтирган юқоридаги каби саволларга жавоб топишингиз мумкин бўлади. Аввал ҳам айтганимиздек, футбол клубларининг давлат улуши бор бўлган корхоналар томонидан молиялаштирилишига барҳам бериш керак. Клублар телетранслациялар, ҳомий ташкилотлар ва албатта ўз тарбияланувчиларини сотиш орқали даромад қилиш йўлига ўтишлари муҳим. Айнан учинчи йўналиш “Футболчилар мақоми ва трансфери бўйича регламент” орқали тартибга солинади. Шундан келиб чиқиб айтиш керакки, ЎзПФЛ ёш гвардияси футболимизда жиддий реформалар қила олаётгани кўнгилга оз бўлса-да таскин беради.