Хавфсизлик учун дея эркинлигидан воз кечганлар хавфсизликдан ҳам, эркинликдан ҳам маҳрум бўладилар Бесланда бундан 17 йил аввал юз берган терактдан кейин кўрилган биринчи чора губернаторлик сайловларининг бекор қилиниши, сайловда қатнашиш цензларининг кучайтирилиши, сўз ва матбуот устидан мутлақ назоратни ўрнатилиши бўлганди. Россияликлар, ўзларини хавфсиз сезишлари учун бу чекловларни индамайгина, сукут билан қабул қилишганди. Лекин Бесландан кейин ҳам фожеали терактлар тўхтагани йўк. Владикавказ, Домодедово, Волгоград, Москва метросидаги терактлар. Бугун эса Қозонда мудҳиш воқеалар рўй берди. Тўққиз нафар мактаб ўқувчиси ва икки ўқитувчининг қотилига айланган кимса уйидан теракт амалга оширилган мактабгача қўлида кесма милтиқ ва ўқдонлар билан пиёда юриб борган. Навальний деб қичқирилса, сониялар ичида пайдо бўладиган ОМОН йўқ, полиция йўқ, Нацгвардия йўқ. Қарангки, терактдан кейин сон саноқсиз куч идоралари тафтиш қилинмоқдами? Ё кимдир масъулиятни бўйнига олиб истеъфога чиқдтими? Йўқ. Бунинг ўрнига Путиннинг парламентга ўтқазиб қўйган шотири Володин интернетда анонимликни бекор қилишга чақирмоқда. Яъни россияликлар буёғига интернетга шахсий маълумотларини рўйхатга киритиб, тасдиқлатиб кириши керак эмиш. Ва эҳтимол россияликлар йиллар давомида хавфсизлик борасидаги аччиқ тажрибани яна бир бор ўз таналарида ҳис этадиган кўринадилар: Хавфсизлик учун дея эркинлигидан воз кечганлар хавфсизликдан ҳам, эркинликдан ҳам маҳрум бўладилар. Том маънодаги хавфсизлик эркинликни кенгайтириш орқали яралади, у эркинлик қурбонини талаб этмайди.