Минг афсуски, бу юз берди Шунчаки эслатиб ўтиш жоизки, сўмнинг эркин конвертацияси рўй бергунча, айниқса 2016 йил давомида ва 2017 йил сентябргача валюта кредит олиш оддий тадбиркорлар учун деярли имконсиз бўлган. Рискини тўғри ҳисоблай оладиган, ҳар сўмининг қийматини биладиган тадбиркорлар эса валютада умуман кредит олмаган. Конвертацияга навбатни, квотасини ойлаб, керак бўлса йиллаб кутган. Валютадаги кредитларга "доступ" асосан маъмурий йўллар, ҳокимликлар ва вазирликлардаги манфаатдорларга яқин бўлган "тадбиркорлар"дагина бўлган. Эркин конвертацияга ўтилиши арафасида валютада кредит олганларнинг аксари 2-3 карра шиширилган импорт контрактларини молиялаштирган. Яъни бу ишлар онгли равишда қилинган, каррали фарқ ўша даврдаёқ ўзлаштирилган ва тақсимланган. 2017 йил ёзида сўмнинг эркин конвертациясига тайёргарлик бораётгани ҳақида ҳамма, ҳатто ёш болалар ҳам биларди. Рискини тўғри баҳолаганлар, лойиҳалари фақат ўзлаштиришдан иборат бўлмаганлар ўша кунлардаёқ рискларини хеджирлашга, йўқотишларни минималлаштиришга ўтган. Бутун фаолияти фақат ўзлаштиришдан иборат бўлган люмпен ва чўнтак "тадбиркорлар" эса қачондир давлат яна курс фарқини солиқ тўловчилар ҳисобига сочиб, қоплаб беришини кутишда яшашди. Минг афсуски, бу юз берди.