Каримов барча хатолари билан ҳам ўз даврининг қудратли шахси. Қарийб 30 йил давомида у ўзи истаган мамлакатни ўзининг қарашлари билан яратди. Буни констатация этиш керак. Шу маънода Каримовга берилган баҳолар ва қайта баҳолашлар ҳақида. Каримовга унинг атрофида жамланган айрим сиёсатчи отарчилар, отарчи сиёсатчилар, ёлғончилар, ўғри иккиюзламачиларнинг берган баҳоси, назаримда, бу бузуқ баҳо. Эшитган одамни ижирғантиради. Унга Халқ, у билан бир замонда яшаган, ундан жабр, ситам, қўрқув, зулм, марҳамат, ишонч кўрган Халқ баҳо берган ва бундан кейинам Халқ баҳо беради. Тарих юз берган, бўлиб ўтган, уни ўзгартириб бўлмайди. Тўғри, ўлиб кетган одамга қарши курашиш, тош отиш осон, хавфсиз. Чунки у жавоб бермайди. Қўлингиздан келса, ҳозирги терс, адолатсиз ишларга қарши курашинг, ёлғончиларга қарши туринг. Ҳа, Каримовдан кейинги дастлабки йилларда каримовча ўтмишни қоралаш обрў, вазн ва эътибор келтирди. Чунки каримовча ўтмишни қоралаш билан бирга каримовча муаммоларни бартараф этиш ҳам юз берди. Охирги йилларда-чи? Каримов эпохасига тош отиш янги даврда ўзимиз ўз қўлимиз билан яратаётган янги муаммолар фонида юз бермаяптими? Шунингчун энди ўтмишга лой чаплаш жуда ишончсиз чиқмоқда ва обрў келтирмаяпти ва ҳаттоки тескари самара бермоқда. Ўтган кунги байрам тантаналарининг айнан Каримовга дохил қисми энг кўп таъсирли ва сентименталь бўлганини сездингизми? Давлат раҳбарининг Каримов билан бир ва ёнма-ён бўлган суратлари ва лавҳалари олқишланганини-чи? Ўтказиб юборган бўлсангиз, буни билиш учун тармоқларни кузатиш, оддий одамлар билан суҳбатлашиш кифоя. Яна эсда тутиш лозимки, Каримовга нисбатан йўқолмаётган ностальгия бу қўрқув ёки иррационал қатиққўллик, репрессиялар ва биқиқлик соғинчи эмас. Ностальгияни телба-тескари ҳаракатлар, хаспўшланаётган янги муаммолар, сўзда ва амалда узвийликнинг йўқлиги, иқтисодий ўсиш кўпчилик ҳаётида акс этмаетгани туфайли эртанги кунга ишончнинг сўниб бораётгани яратмоқда. Халқ бугунги куни кечагидан, эртанги куни бугунгидан фаровонлашиб бораётганини телевизор ёки статистика орқали эмас, ўз танасида сезишни бошласа ўтмиш билан эмас, келажак билан яшай бошлайди. Шундай экан, бизга ижтимоий тенгсизликни эмас, ялпи фарвонликни таъминлайдиган иқтисодий сиёсат керак, эркинликларни таъминлайдиган ҳуқуқ керак, Токи солиштирсак, ҳаётимизни ўтмишимиз билан эмас, биздан илғор ва эркин мамлакатлар билан солиштирадиган бўлайлик.