Олтин яна 1800+ долларлик коридорга қайтди Айни соатларда олтиннинг унцияси 1806 доллардан таклиф этилмоқда. Бу коридорда қимматли металл яна қанча туради, ҳозирча бир нима дейиш қийин. Кейинги ойларда олтин нархларининг волатиллиги (тез ўзгарувчанлиги) ошаётгани унинг котировкаларига таъсир кўрсатувчи омилларнинг ортиб бораётгани билан боғлиқ бўлмоқда. Анъанавий равишда юқори инфляция, техник омиллар - кутилмаган кризис, можаро ва тўқнашув эҳтимоллари олтин нархини қўллаб келган. Барқарорлик ва долларнинг мустаҳкамланиши эса аксинча. Гап шундаки, уларнинг қаторига криптовалюталар ҳам қўшилди. Энди аксар инвесторлар ўз активларини йўқотишлардан хеджлашда нафақат олтин, криптовалюталардан ҳам фойдаланишмоқда. Яъни секин-аста криптовалюталар олтиннинг рақобатчисига айланмоқда. Агар кейинги йиллардаги криптовалюталарнинг ошиши ва тушиши тўлқинларига назар солинса ва олтин котировкалари ўзгаришлари билан чоғиштирилса, юқори даражада бўлмасада, тескари узвийликни пайқаш мумкин бўлади.