Шиддат билан ўсаётган импорт 2019 йил кўрсаткичларигача тикланди Кутилганидек, пандемиядан аввалги даражага импорт тезроқ етиб келди. 2021 йилнинг 10 ойи давомида импорт 20,2 млрд.долларга етган. Бу пандемиягача бўлган охирги тўқ йил - 2019 йил кўрсаткичидан 0,3 млрд.долларга кўпроқ дегани. Импортнинг ўсиш тезлиги кейинги ойларда нафақат 2019 йил, балки 2021 йилнинг ҳар бир ойига нисбатан юқорилаб бормоқда. Экспортнинг ўсиши, афсуски анча ортда қолмоқда, 4 ойлик танаффусдан кейин қарийб 1 миллиард долларлик олтин сотилгани ҳам импортдан фарқни камайтиришга ёрдам бера олмаган. Ташқи савдонинг салбий сальдоси 7,8 млрд.долларга етган. Бунинг 3,5 млрдлик қисми ҳали кириб кетишга улгурмаганимиз ЕОИИ ҳиссасига тўғри келади. Ўша жойга кириб кетсак, қандай даражага етилади ҳозирча холис баҳолашлар йўқ. Асосий экспорт йўналишимиз Туркияга экспорт ҳажми суръатида сусайиш кузатилган. Октябрда бор-йўғи 110 млн.долларлик экспорт амалга ошган, бу сентябрь кўрсаткичига нисабатан 17 фоиз камроқ. Экспортнинг қисқариши лиранинг қадрсизлариниши билан боғлиқми ё асосий экспорт товарларимиздан бўлган калава экспортига бюрократик чекловлар таъсирими, бир нима дейиш қийин. Баланд минбарлардан тўхтатилган дейилган газ экспорти ўсиб бораётганига эътибор қаратмаслик мумкинмас. Йил бошидан буён қарийб 600 миллион долларлик газ четга сотилган, октябрь ойининг ўзида 81,3 млн.долларлик газ четга чиқарилган. Асосий ишлаб чиқариш ҳажми ички истеъмолга йўнатирилган Ўзбекнефтегаз экспортни тўхтатган, деб ҳисобласак, унда кимлар газ экспорт қилаяпти?