​Газ экспорти янада тезлашган, газ импорти эса деярли тўхтаб қолган Ўзбекистон ноябрь ойида 51,2 млн.долларлик газ экспорт қилган. Бу октябрдаги экспорт ҳажмидан 10%га кўпроқ. Яъни газ қазиб олишнинг қисқариши газ экспорти тезлигини тўхтата олмаган. Қизиқ тарафи, газ импорти деярли тўхтаган. Ноябрь ойида атига 1 млн.долларлик газ импорт қилинган. Агар энергетикларимиз айтгандек, кунига 9 млн.куб "ўрис" газини импорт қилаётган бўлганимизда, бу қийматда ойига камида 60 млн.долларни ташкил этган бўларди. Хуллас, саволлар янада кўпайган. "Ўрисники" дейилган газни де-факто олаяпмизми ёки йўқми? Ўтган ойда ташқи савдонинг яна бошқа муҳим жиҳатлари: Ўрис ва Хитойга қарамлигимиз, айниқса импортда янада ортмоқда, қўшнилар билан савдоимиз улуши эса, минг афсуски, қисқармоқда. Шундоқ биқинимиздаги туркман ёки қозоқ қардошлардан нефть маҳсулотларини олиш ўрнига камида 3 минг километрдан ўрис нефть ва бензинини ташиганимиздан кейин яна бошқача натижа бўлиши мумкинми? Энергетиклар энергетик хавфсизлик деганда севимли оғалари нефтига қарам бўлишни тушунишса керак. Олтин экспорти мутлақ тарихий рекорд — 8,2 млрд.долларга етган. Олтинсиз экспорт ҳам асосан бошқа рангли металлар ҳисобига ўсган. Ташқи савдо дефицити ҳам янги рекорд 10,9 млрд долларга етган. Дефицитни барқарорлашига яқин истиқболда ишоралар йўқ. Импортнинг катта қисмини автомобиллар, кимё маҳсулотлари ва самолетлар ташкил этмоқда. 20 йилгача эксплуатацияда бўлган самолетларни олиб киришга рухсат этилиши эски самолетлар импортини кескин оширган.