Газ экспорти тўхтамай давом этмоқда Ўзбекистонликлар ва ўзбек иқтисодиётининг сурункали оғриғига айланган газ тақчиллиги газ экспорти ва импорти каналларини ўзиники қилиб олган ўртамчилар учун кафолатланган даромад манбаидир (айниқса газ импорти бюджетдан субсидияланаётгани ҳисобга олинса). Дефицит, оғриқ ва муаммо қанча катта бўлса, ўртамчиларнинг даромади шунча кўпаяверади. Ноябрда ҳам газ экспорти жадал ўсишда давом этган ва 55,9 млн.долларни ташкил этган (октябрда 22 млн.долларлик, ўтган йили ноябрда 53 млн.долларлик газ экспорт бўлган). Йил бошидан буён экспорт бўлган газ 624,1 млн.долларга етган. Айни пайтда газ импорти ҳам кескин ошиб, 334,3 млн.долларни ташкил қилган (октябрда 190,2 млн.доллар, ўтган йили ноябрда 186,8 млн.доллар). Йил бошидан бери импорт қилинган газ 1 456,8 млн.доллардан иборат бўлган. Асосий экспорт товаримиз олтин бу ойда ҳам яна экспорт бўлмаган. Лекин олтин импорти яна кескин ошган (207,3 млн.доллар). Ойлик экспорт ҳажмининг ўсиши 5,2%гача секинлашган (хизматлар экспорти 3,2%га камайган) бўлса, импортнинг ўсиш суръати янада тезлашган (+36,9%). Газ ва олтин импорти ўсгани билан бирга, сўмнинг мустаҳкамланиши ҳам бунда базавий омил бўлаётганини қайд этмаслик мумкин эмас. Афғонистон ниҳоят Қозоғистонни қувиб ўтиб, экспортдаги 3- ҳамкоримизга айланган.