Газ экспорти 2,8 карра ошган, газ импорти эса деярли тўхтаган Март ойида 52,3 млн.долларлик куб газ экспорт қилинган. Бу ўтган йилнинг мартига нисбатан 2,8 карра кўп. Газ импорти эса 71 карра қисқарган, яъни деярли тўхтаган. 2,7 млн.долларлик газ импорти қайд этилган (ўтган йили март ойида 193,5 млн.долларлик газ импорт бўлганди). Эҳтимолки, ўзимизнинг газимизни импорт қилиб кўрсатиш ва субсидия ундириш билан боғлиқ манипуляциялар тўхтаган. Март ойидаги ташқи савдо картинасини кутилганидек, олтин экспорти кескин ошгани (1,9 млрд.доллар) ва импортнинг, хусусан нотариф чекловлар босимида қисқариши тезлаша бошлагани (айниқса автомобиль) белгилаган. Импортнинг сунъий равишда қисқариши бутун йил давомида давом этса керак (савдо уруши оқибати ўлароқ Хитойдан босимлар юз берган тақдирда ҳам). Энг йирик ҳамкорлар бешлигида фақат Қозоғистон билан савдо ҳажми ўсмоқда. Хитой ва Россия билан савдонинг қисқариши диверсификация ҳисобига тўлдирилаётгани жуда хурсанд қилади. Кейинги бешликдаги Афғонистон, Франция, Германия, Ҳиндистон ва БАА билан савдо барқарор ўсмоқда. Суръатлар сақланса, Афғонистон шу йилнинг ўзида энг йирик ҳамкорларимиз бешлигига кириши мумкин.