Март ойида газ импорти кескин ошган Газ қазиб олиш юқори суръатда пасайиб бориши фонида ўтган ойда газ импорти кескин ошган. Агар январь ва февраль ойларида 1,7 млн.долларлик газ импорт қилинган бўлса, биргина март ойининг ўзида ташқаридан 151,2 млн.долларлик газ сотиб олинган. Газ қайси мамлакатлардан ва қанақа нархларда сотиб олинаётгани тўғрисидаги маълумотлар очиқланмаган. Март ойида Ўзбекистон ёқилғи энергетика маҳсулотлари (нефть, газ, кўмир, электр) сотиб олиш учун жами 306 млн.доллар сарфлаган. Айтиш керакки, бир муддатли танаффусдан кейин газ экспорти ҳам яна тезлашган. Март ойида жами 20 млн.долларлик газ экспорти амалга ошган. Умуман олганда, март ойида 1,2 млрд.долларлик олтин сотилганига қарамай, экспорт (2 524,3 млн.доллар) импортдан (3 277,5 млн.доллар) ортда қолишда давом этган ва биринчи чоракда жамланган салбий сальдо 3,4 млрд.доллардан ошган. Март ойида Хитой яна биринчи раақмли савдо ҳамкори номини Россиядан тортиб олган. Топ экспорт йўналишларида Хитой ва Туркияга экспортнинг қисқариши давом этмоқда. Қўшимча равишда, Қирғизистон ва Афғонистонга ҳам экспорт қисқариши қайд этилган. Бу албатта ташвишли. Ўзбекистон учун хос бўлмаган электр алоқаси, саноат учун махсус бўлмаган, канцелярия ва генератор машина ускуналари экспорти юқори суръатда ортиши давом этмоқда. Айни шу товарларнинг импорти ҳам ошаётгани жуда қизиқ. Мазкур товарлар бўйича экспорт ва импорт таркибий географияси очиқланмаган. Машина ва ускуналар импорти ўсиши юқорилигича қолмоқда. Фақат бу сафар самолетлар ҳисобига эмас, автомобиллар ҳисобига. Март ойида қарийб 425 млн.долларлик автомобиль билан боғлиқ импорт қайд этилган. Бойлар самолет сотиб олишни вақтинча тўхтатишган.