Газ, нефть ва бензин импорти кескин ошган Биринчи ярми совуқ келган март ойида 158,3 млн.долларлик газ импорт қилинган, бу ўтган йилнинг шу даврига нисбатан 58,6 баробар, февралга нисбатан эса 4,6 карра кўпроқ (эҳтимолки, газ қазиб олишнинг қисқариши тезлашган — ушбу пост ёзилаётган 30 апрель кечги соатларда ҳали саноат статистикаси эълон қилинмаган эди). Газдан ташқари, нефть маҳсулотлари (319,7 млн.доллар) ва шу жумладан бензин импорти (157,4 млн.доллар) ҳам кескин ошган. Таъкидлаш керакки, Статқўм ва Божхона қўмитаси маълумотларида март ойига оид бензин импорти деярли 2 карра фарқланган. Импортнинг кескин ошганига қарамай, газ экспорти яна ҳайратланарли тарзда ўсган ва ой давомида 29,6 млн.долларлик газ экспорт қилинган (февралда 7,1 млн.долларлик экспорт бўлган). Март ойи ташқи савдоси яна олтин экспорт қилинмагани билан характерли. Лекин статқўм махсус экспорт иборасини ишлата бошлаган ("махсус экспортни ҳисобга олмаганда экспорт ўсган"). Махсус экспортга қайси товарлар кириши аниқлаштирилмаган (мис? уран?, камёб металлар?). Афғонистон барқарор равишда 5- савдо ҳамкоримизга айланган (экспортда учинчи). Францияга экспорт ўсиши тезлашган (уран?). Янада қизиғи, Гонконг экспорт йўналишида топ-10га кирган (Гонконгга нима экспорт қилмоқдамиз?). Хизматлар экспорти ўсишда давом этмоқда, лекин суръати анча секинлашган.