Ташқи савдо ҳажмида уруш оқибатлари акс этишга улгурмаган Ташқи савдо юқори суръатларда ўсишда давом этмоқда. Март ойи якунларига кўра, экспорт 5 772,7 млн.долларга (+1 676,2 млн.доллар) , импорт 7 383,1 млн.долларга (+ 2 746,2 млн.доллар) етган. Март ойида экспортнинг 609 млн.доллари олтин ҳисобига тўғри келган. Россия агрессиясига учраган Украина ТОП-10 савдо ҳамкорларимиз қаторидан чиқиб кетган. Март ойида Украинадан импорт 26,6 млн.долларни ташкил этган бўлса. экспорт -0,5 млн.доллар этиб қайд этилган. Балки бу статистикамизнинг навбатдаги хатолиги бўлиши мумкин (Январь-февраль экспорти 36,1 млн.доллар, январь-март экспорти эса ундан камроқ - 35,6 млн.доллар деб кўрсатилган). Агрессор Россия ва унинг ягона иттифоқчиси Беларусь билан савдо ҳажмида камайиш кузатилмаган. Афғонистонга ҳам экспорт ўсиши тезлашган ва энди қўшниларимиз асосий савдо ҳамкорларимизнинг ТОП-10талигида (экспорт учун тўлов қандай амалга оширилаётгани ҳалиям саволли). Экспорт таркибида газ экспорти ошган. Март ойида январь-февраль ойларидан экспорт қилинганидан 2 баробар кўпроқ газ экспорти рўй берган. Электр энергияси. автомобиллар экспорти ҳам йил бошидаги ойларга нисбатан фаоллашаётганини таъкидлаш зарур. Импорт таркибида озиқ-овқатлар ва нефть маҳсулотлари импорти улушда ҳам, миқдорда ҳам ошиб бормоқда.