​Инвесторларни чиройли рақамлар чақирадими? Статагентлик: "Шу билан бирга мамлакатимизда бир йилдан ортиқ фаолият юритаётган хорижий қурилиш компаниялари мавжуд бўлиб, улар йирик махсус ихтисосликни талаб этадиган энергетика ва тоғ-кон саноатидаги йирик лойиҳаларда ишлар бажариб келишмоқда. Бироқ, мамлакатда рўйхатдан ўтмаганлиги сабабли улар томонидан бажарилган қурилиш ишлари ҳажмини ҳудудларга тақсимлаб бўлмайди". Ўзбекистонда ҳеч қурса доимий муассаса ташкил этмай, рўйхатдан ўтмасдан туриб, Ўзбекистонда триллионлаб қурилиш ишларини амалга ошираетган хорижий компанияларнинг ҳеч қурса учтасининг номини келтиринг, илтимос. Шу хатбошини тўқишдан олдин, солиқ кодекси билан танишиб, солиқчилар билан бир келишиб олсангизлар бўларди. Статагентлик: "Хорижий компаниялардан  ойлик қўшимча маълумот олиш имконияти мавжуд эмаслиги ҳамда буюртмачилар фақат чораклик даврийликда ҳисобот тақдим этишларини инобатга олган ҳолда бундай маълумотларни ойлик даврийликда аниқ ҳисоблаш имконияти мавжуд эмас". Яна ёпишмаяпти. Агар хорижий компаниялардан фақат чораклик маълумот олинаетгани рост бўлса, унда 2022 йил октябрида қурилиш статистикасига қўшиб юборилган 1248,1 млрд.сўм қаердан?. Ноябрдаги қўшиб юборилган 629,9 млрд.сўм-чи? Бунга қанақа изоҳлар тўқиш мумкин? Статагентлик: "Сизнинг негатив, асоссиз, шов-шувли олди-қочди таҳлилларингиз айнан халқаро инвесторларни чалғитишга сабаб бўлиб, мамлакатимизнинг инвестицион жозибадорлиги ва салоҳиятини ошишига салбий таъсир ўтказади". Агар телеграм каналдаги биргина пост мамлакатда инвестицион жозибадорликни пасайтираётган бўлса, демак, аҳволимиз мен кутганимдан ҳам анча абгорроқ экан. Ва чиройли рақамлар билан жозибадорликни оширмоқчи бўлаётган экансиз, мен сизларга бу йўлда муваффақият тилайман. Фақат рақамларингиз ва изоҳларингиз ўзаро ёпишиши керак бўлади. Яна статистикани имкон қадар юзаки ҳолда ушланг, қанча чуқурроқ маълумот ошкор қилинса, шунча кўпроқ билиниб қолади.