​Март ойида статистикага 2,6 трлн.сўмдан ортиқ қурилиш ишлари ғойибдан "қўшилиб қолган". Бу ЯИМнинг 1%идан кўпроқ Бу борада "қўшиб ёзилган" деган иборани ишлатиш унча тўғри бўлмайди, чунки қўшиб ёзиш ҳаракатларини тергов ва суриштирув ва бошқа маҳкама жараёнларида аниқлаш мумкин. Демак, расмий статистикага кўра, март ойида 14 616,6 млрд.сўмлик қурилиш ишлари бажарилган. Бу январь ва февраль ойларини қўшиб ҳисоблагандаги миқдордан (12 948 млрд.сўм) ҳам кўпроқ. Ўзбекистон статистикаси тарихида, эски даврдаям, янги дейиладиган даврда ҳам ҳали ҳеч қачон бир ойда бажарилган қурилиш ишлари икки ойдаги ишлардан кўпроқ бўлмаган. Шу сабабли расмий рақам жуда шубҳали кўринди. Бу борада қайси вилоят жонбозлик кўрсатгани, табиийки, қизиқ бўлди. Вилоятлар қирқимида маълумотлар жамланганда аниқ бўлдики, январь-март ойларида жами 24 962,5 млрд.сўмлик қурилиш ишлари бажарилган. Расмий статистика бўйича эса 27 564,6 млрд.сўм. Демак, 2 626,1 млрд.сўмлик қурилиш ишлари "ғойибдан" қўшилиб қолган. Қизиқ тарафи, январь ойида ҳудудлар қирқимида атига 0,1 млрд.сўмлик, февраль ойида эса 77 млрд.сўмлик фарқ бўлган холос. Буни минглардан миллиардларга яхлитлашга ёки оддий техник хатоликка йўйиш мумкин. Лекин март ойидаги қўшилиб қолган нақ 2,6 трлн.сўмни техник хатолик деб аташ имконсиз. Иқтисодиётнинг айрим соҳалари, масалан хизматлар кўрсатишда ҳудудлар бўйича бўлинмайдиган рақамлар бўлади. Масалан, халқаро ва умумреспублика бўйлаб темирйўлдаги ва автомобиль йўлларидаги ташувларни, бутун республика ҳудудидаги амал қиладиган суғурта қопламаларини ҳудудлар бўйича тақсимлаб бўлмайди. Лекин қурилишда ундай эмас. Қурилишда аниқ объект, аниқ манзил, аниқ ҳудуд, аниқ қирқим бор. Бу сафар ҳам ҳолатни ўзбек статистикасининг мўъжизаларига (саволли маневрларига, саволли методларига) йўллаб кетиш мумкин эди. Лекин бу энди статистиканинг ҳатто ички қоидаларига ва биринчи хатбошида ишора қилганимиздек қабул қилинган ҳукуқ нормаларига ҳам зид. Тушунган бўлсангиз, гап энди ўзбек статистикасининг репутацияси ёки унга ишониш ёки ишонмаслик ҳақида кетмаяпти.