​Ўзбекистоннинг иқтисодий эркинлик рейтингида аҳволи ёмонлашган Аҳволимизнинг ёмонлашишига Суднинг самарадорлиги ва Мулкчилик ҳуқуқи бўйича вазиятнинг орқага кетгани энг кўп таъсир ўтказган. Ростанам, охирги йилларда мустақил суд йўқлиги ва мулк ҳуқуқи чангга айлантирилганини ўзбекистонликлар ўзининг танасида ва ҳаётида ҳис этишмоқда. Яна шунингдек, бизнес эркинлиги, меҳнат бозоридаги эркинлик, ҳукумат яхлитлиги, солиқ юки, давлат харажатлари ва фискал саломатлик позицияларида ҳам ортга қайтиш юз берган. Умумий қилиб олганда, ҳуқуқ устуворлиги, давлат аралашуви ва тартибга солиш самарадорлиги масалаларида аҳвол оғирлашган. Буларнинг ҳаммаси қўшилиб, иқтисодий эркинлик рейтингида 9 поғонага, 117- ўрингача пасайишимиз юз берган. Ҳақиқат учун айтиш жоизки, Путин Россияси таъсири остидаги барча МДҲ мамлакатлари рейтингда пастга шўнғишган. Қайсидир маънода Россия ва унинг саттеллитлари ўз маконларида қонун ва эркинликдан ташқаридаги зулмат моделини - янги Олтин Ўрдани қураяпти деб аташ мумкин. Рейтингда ТОП-50дан фақат тўртта собиқ совет ўлкаси жой олган. Булар Россия таъсиридан росмана озод бўла олган ва эркин тараққиёт йўлини тутган, эркин сайловларда доимий алмашинадиган ва фуқароларга ҳисобдор ҳукуматга эга Эстония (7- ўрин), Литва (17-ўрин), Латвия (18-ўрин) ва Грузия (26- ўрин).