Сўз эркинлиги рейтингида Ўзбекистоннинг ўрни ёмонлашган "Чегарасиз репортёрлар" ташкилоти 2023 йил учун тузилган рейтингида Ўзбекистон 137-ўринда қайд этилган. Анъанага кўра жаҳон матбуот эркинлиги куни арафасида эълон қилинадиган рейтингдаги умумий ўрнимиз ўтган йилга солиштирганда 4 поғонага ёмонлашган. Сиёсий (-3), иқтисодий (-9) ва ижтимоий (-9) индикаторларда қуйига шўнғиганмиз. Хулосаларда ҳокимият ОАВ ва ҳукумат билан боғланган қатор блогерларни етарли даражада назорат қилиши, чиновниклар журналистларга иқтисодий жиҳатдан босим ўтказиши ёки сотиб олишга уриниши, ижтимоий тармоқлар расмий ОАВлар деярли ёритмайдиган коррупция билан боғлиқ ахборотларни алмашадиган платформага айлангани кўрсатиб ўтилган. Постсовет маконида Ўзбекистондан ташқари яна Россия (164- ўрин), Беларусь (157- ўрин), Тожикистон (153- ўрин), Қозоғистон (134- ўрин), Қирғизистоннинг (122- ўрин) сўз эркинлиги билан боғлиқ рейтинги ёмонлашган. Сўз эркинлиги энг юқори дея Норвегия, Ирландия ва Дания топилган бўлса, энг ёмон учликни Шимолий Корея, Хитой ва Вьетнам эгаллаган.