​Сўз эркинлиги рейтингида баллимиз яна пасайган, лекин ўрнимиз бироз яхшиланган Чегарасиз мухбирлар (Reporters Without Borders) анъанавий тарзда ҳар йили эълон қиладиган сўз эркинлиги рейтингида Ўзбекистон 180 давлат орасида билан 147- ўринда қайд этилган Ўрнимиз 2025 йилдаги кўрсаткичдан бир поғона юқорилаган, лекин тўпланган баллар 35,24дан 34,95гача пасайган. Ўрнимизнинг бир поғона яхшилангани бизнинг қатордаги давлатларда сўз эркинлиги билан боғлиқ вазият кўпроқ ёмонлашгани билан боғлиқ. Индикаторлар бўйича қаралса, иқтисодий ва хавфсизлик бўйича ўрнимиз ва вазият (тўпланган баллар) яхшиланган. Сиёсий ва ижтимоий, шунингдек ҳуқуқ (балл бўйича) индикаторларда яна орқага кетиш бор. Индексга кўра, Марказий Осиёда қўшниларимиз Қозоғистон, Тожикистон ва айниқса Қирғизистонда сўз эркинлиги билан аҳвол ёмонлашган (Туркманистон доимгидек рўйхатнинг охирида жойлашган). Ўзбекистоннинг мазкур рейтингдаги ўрни ўтган ёмон замон доим энг охирги қаторда бўлган, 2017 йилдан кейин аҳвол яхшилана борган ва 2022 йилда сўз эркинлиги бўйича 133- ўрингача чиққанмиз, кейин яна пасайиш қайд этила бошлаган (2024 йилдан яна қизилга тушиб қолганмиз). Сўз эркинлиги рейтинги Ўзбекистон Республикаси учун устувор бўлган халқаро рейтинг ва индекслар рўйхатига киритилган.