Ўзбекистон: Фискал саломатлик ва давлат харажатлари индикаторлари сезиларли тарзда ёмонлашмоқда Буни нафақат ўзбекистонликлар ўз танасида ҳис этишмоқда, пропаганда пиар учун кўп таянадиган рейтинг кўрсаткичлари ҳам намоён этмоқда. 2023 йил "Иқтисодий эркинлик" рейтингида бешта индикатор — Фискал саломатлик (-11,3), Давлат харажатлари (-3,2), мулкчилик ҳуқуқи (-0,7), бизнес эркинлиги (-0,2) ва суд фаолияти самарадорлиги (-0,1) кўрсаткичлари пастлашда давом этган. Айтиш керакки, мазкур индикаторлар ўтган йилги рейтингда ҳам сезиларли кўринишда ёмонлашганди. Фискал саломатлик ва давлат харажатлари масаласида аҳвол тубга қараб кетаётганлигини охирги икки йилдан бери тасдиқланган бюджет дефицити кўрсаткичларига намойишкорона амал қилинмаётганлиги, харажатларнинг ўсишини тиювчи институтларнинг формал фасадга айлангани, давлат харажатлари самарасиз лойиҳалар ва тўхтамаётган зарарли тажрибалар туфайли ошаётганлиги, буларнинг ҳаммаси кенг аҳоли қатламлари турмуш тарзида ва чўнтагида акс этаётгани, ижтимоий тенгсизлик ортаётганида кўриш мумкин. Шу маънода бу рейтинг бизга Америка очиб бераётгани йўқ. 2023 йил Иқтисодий эркинлик рейтингини ўтган йилдаги каби Сингапур, Швейцария ва Ирландия бошқариб туришипти. Постсовет маконида Россия билан боғлиқ тоталитар ўтмишдан қутула олган Эстония (6- ўрин), Латвия (17- ўрин) ва Литва (20- ўрин) етакчи бўлиб туришипти. Уларнинг иқтисодиёти етарлича эркин деб топилган. Ўзбекистон иқтисодиёти етарлича эркин бўлмаган қизил гуруҳга киритилган ва рейтингда 109- ўринни эгаллаб турипти. Гуруҳимизда Нигерия билан ёнма-ён иттифоқчимиз Россия (125- ўрин), шунингдек, Беларусь (145- ўрин) ва Тожикистон )146- ўрин) ҳам жой олган. Энг ёмон репрессив иытисодиёт гуруҳига Туркманистон (161- ўрин) киритилган.