"ТиБиСи яхши банк эдику"
Кечадан буён телефон ва мессенжерлар орқали энг кўп эшитганим савол шу бўлди:
"ТиБиСини роса мақтардинг, яхши банк деб. Депозит фоизини туширипти, ўтказма комиссиясини оширипти, иловаси яхши ишламаяпти".
Албатта, мен кимгадир ТиБиСини тавсия этган бўлсам, бунга масъулман, менгаям оғриқли. Шу ўринда айрим фикрларни айтиб кетмасам бўлмайди.
Ростанам, банк мижози бўлган жисмоний шахслар борки, кечадан буён смс олаяпти: ТиБиСи 1 мартдан бошлаб депозитлар бўйича ставкани 21%дан 18%гача туширмоқда. Бунга нима туртки бўлганини билмайман, охирги очиқланган маълумот бўйича ТиБиСи 450 млрд.сўмдан ортиқ жорий депозит жалб қила олганди. Балки Банк фойдага чиқишни кўзлаётгандир, чунки ўтган йилни банк 137 млрд.сўмдан ортиқ зарар билан якунлаган.
Нима бўлгандаям, кўпчилик банкнинг бу қарорини банк ўтган йил давомида жуда қулай шартларда ва жозибали таклифлар билан йиғилган 300 мингга яқин мижозларга нисбатан маъқул бўлмаган ҳаракат, дея баҳолмоқда.
Мен уларни тушунишга ҳаракат қиламан. Мисолчун, сиз агрессив реклама ё тавсиялар таъсирида бир муддат давомида ТиБиСи депозитига мослашдингиз, пул жамғариб бораяпсиз, сизга шартлар ёқаяпти ва "бац" - энди комфортга кўникканингизда, бирданига банк фоизларни пасайтириб юбормоқда. Сиз янги шартларга рози эмассиз, демак, бошқа банк қидиришингизга тўғри келади. Жудаям анъанавий, банк тугул, йиллаб яшаётган жойи, ейдиган овқати ё касбини ўзгартиришни истамайдиган анъанавий ўзбекистонликлар учун бу ростанам стресс ҳолат. Масалан, уларга мана - бозорда 20, 21 ва ҳатто 23%лик аналог таклифлар бор, дейиш бу тоифа учун маънога эга эмас. ТиБиСи оферта шартларида бир томонлама фоизларни туширишга ваколатли, сен бу офертани қабул қилгансан дейишим, уларнинг фақат энсасини қотиради, худди олов устига керосин қуйгандек бўлади. Лекин ёқмаяптими, сизда бошқа альтернатива йўқ.
Банк аниқ тиниқ қилиб сизга мурожаат қилаяпти:
"Юқорида кўрсатилган ўзгартиришлар билан рози бўлмасангиз, сиз барча пул маблағлари ва ҳисобланган фоизларни талаб қилиш, шунингдек "TBC Bank" мобил иловасида очилган талаб қилиб олгунча депозит ҳисобварағини ёпиш ҳуқуқига эгасиз."
Ўтказмалар учун 0,4%дан 0,5%гача оширилган комиссияларга келсак, тўғриси, мен транзакцияларда ТиБиСи иловасидан фойдаланмайман, кимгадир тавсия қилганимни ҳам, тўғриси, эслолмадим. Охирги пайтда бошқа банкларнинг иловаларидан фойдаланиб келаяпман (реклама бўлмаслиги учун айтиш шарт эмас). Авваломбор, мен ишлатаётган иловаларда Ҳумо учун ўтказмалар бепул, кейин тез. Мени бу қаноатлантиради.
ТиБиСи иловасига келсак, ростанам, илованинг ишлаши ўзи секин эди, ҳозир янаям секинлашган. Доим кузатиб бораман, банклар орасида ТиБиСи иловасини юклаб олиш ҳам энди биринчи ўринда эмас. Балки илованинг ишлаш сифатига мижозлар ва транзакциялар сони, маълумотларни қайта ишлаш қийинлашиб бораётгани таъсир этаётгандир. Илованинг ишлаши ёмонлашса, контакт центрга юклама ошади. Бу муаммоларни тан олиш керак. Бўлмаса, мижозларда "ишончни оқламади" деган тасаввур кучайиб бораверади.