Рубль ҳақида монолог Рубль курси билан боғлиқ аввалги кунларда кузатган ҳодисаларимиз кеча оқшомда ниҳоят, жуда кеч бўлсада, расмий муносабат билдиришга лозим кўрилди. Демак, аҳоли, яъни ўзбекистонликлар ҳалиям субъект бўлмаган ролда, исталганча манипуляциялаш мумкин бўлган қатлам қиёфасида қолмоқда. Биринчидан, рубль нобарқарор ва ноликвид валюта ўлароқ ўзининг аввалги, вақтинча ўртамчилик ўрнини бутунлай йўқотди. Буни маҳраж ўлароқ қабул қилинмаса, кейинги фикрлар ўринли эмас. Рублдан онгли одамлар қочиши керак. Рублдан ақли бор ишбилармон одамлар қочиши керак. Иккинчидан, пул ўтказмалари шу кунгача фақат доллар курси билан боғлиқ бўлган. Бирон бир пул ўтказма йўқки, ўтказмани доллар курсига боғламаган бўлсин. Ниҳоят, буни тан олиш керак. Лекин рубль билан бўлаётган ғалати воқеалар бу принципларга соя солади. Ўтказма ва транзакцияларда рублдан четланиш кераклиги, афсуски, жуда кеч англашилди. Шу англашувга энди амал қилиш керак. Учинчидан, мутлақ кўпчилик пул ўтказмаларидаги технологиялардан мутлақо бехабар. Демакки, бемалол юз бераётган воқеаларда риск ташувчи ўлароқ рус банкларининг геосиёсий мақсадларини эмас, бечора маҳаллабай ўзбек банкларини айблаш осон ва бу мумкин бўлади. Бу энг осон йўл. Демак, бу борада тушунтиришларни кучайтириш керак. Товуққа эмас, ақлга мурожаат энг тўғри йўл. Тўртинчидан, асосийси, одамларга рискларни қабул қилувчи айнан улар эканини ҳар куни, ҳар доим ниҳоят етказиш керак. Давлат мутлақ ва доим қутқарувчи эканини таъкидлаш сиёсати фақат люмпенларни, зараркунандаларни яратади. Биргаликдаги масъулиятнинг мундарижаси ўзгариши керак.